5 biljaka za vaš ljekoviti vrt

Autor: Andrijana Veselinović

Na svom balkonu, u domu, vrtu ili dvorištu možete gajiti ljekovite biljke. Tako ćete stalno imati svoju malu armiju boraca za zdravlje i ljepotu. 

Kamilicu, žalfiju, metvicu, aloe veru i lavandu nije teško uzgojiti, a i ne traže mnogo pažnje. Posadite ih u saksijama ili u bašti i one će vam svakodnevno biti na raspolaganju. Zato, ne budite lijeni – napravite svoj mali “ljekoviti” vrt odmah.

Kamilica je jedna od najpoznatijih ljekovitih biljaka, a njen čaj svi rado pijemo. Ako je sijete u baštici morate čekati jesen, ali u saksijama (koje ćete držati u kući ili na zatvorenom balkonu) možete je posijati i na proljeće. U saksiju, koja ima dobru drenažu (recimo, stavite šljunak na dno saksije) pospite sjemenke kamilice, prekrijte ih zemljom i zalijte vodom. Kamilica ne voli direktno sunce, pa je najbolje stavite s vanjske strane prozora ili na balkon. Cvjetiće sušite na pamučnoj gazi, na mjestu zaštićenom od jakog sunca i sa dobrim protokom vazduha.

Metvica je, pored kamilice, jedna od biljaka koju obavezno imamo u kući. Sijete je ili sadite u vlažnu zemlju na sunčanom mjestu ili u blagom hladu. Brzo će napredovati ako je budete redovno i obilno zalijevali. Listove koristite sušene ili svježe – za čajeve, osvježavajuće napitke ili čak aromatičnu kupku.

Žalfija je mađioničarka među ljekovitim biljkama, jer se koristi u borbi protiv mnogih bolesti, ali i kao odličan začin. Posadite je u zemlju, koja nije previše vlažna i pazite da je na zahvati mraz. Sadnice možete kupiti u bilo kom vrtom centru. Listove je najbolje brati prije nego što počnu da cvjetaju, jer tada biljka ima u sebi najviše eteričnog ulja. Sušite ih nekoliko dana u hladu, na umjerenoj temperaturi. Sušenu žalfiju držite u dobro zatvorenim posudicama, u mraku. (Za šta je sve dobra žalfija pročitajte ovdje)

By: KateMonkey

Aloe vera je najbolja biljka za njegu kože i za brže zarastanje rana i ogrebotina. Sadnice kupujete u vrtnim centrima, a sadite ih u zemlju pomiješanu s pijeskom. Važno je da ima dobru drenažu. Aloe vera traži kutak koji je osunčan ili u blagoj hladovini, a ne podnosi temperaturu nižu od 5 stepeni Celzijusa. 

Lavanda je lijepa i mirisna biljka. Nije mnogo zahtijevna, samo ne smije smrznuti ili će propasti. Najbolje joj pogoduje pješčano, šljunkovito i suho tlo i mjesto sa mnogo sunca. Berete je kada je u punom cvatu – cvjetne štapiće povežete špagom i objesite ih naopako da se suše. Odlična je za mirisne kupke, a u ormarima tjera moljce.